Близначкото рок-дуо Некст тајм е пред нов предизвик. Мартин и Стефан во јули заминуваат на фестивалот Славјански Базар во Белорусија, каде на 10 јули ќе пеат заедно со српската мега-ѕвезда Жељко Јоксимовиќ. Тие на покана од организаторите заминуваат на овој фестивал, на кој ќе пеат во склоп на вечерта посветена на евровизиските ѕвезди. Мартин и Стефан пред тамошната публика ќе ја отпеат токму евровизиската "Нешто што ќе остане", што пред две години ја отпеаја во Москва, и уште еден од нивните хитови. Со која песна уште ќе се претстават пред тамошната публика се уште не знаат, но знаат дека се подготвени за патувањето и почестени што токму тие ќе бидат дел од вечерта на евровизиските ѕвезди.
"Две години по нашето учество на Евровизија не канат, а тоа за нас значи многу. Очигледно сме оставиле добар впечаток", едногласни се Мартин и Стефан, кои освен со Јоксимовиќ на истата сцена ќе застанат и со Ева Ривас од Ерменија, Руслан Алехно, Александра и Константин и Петр Елфимов од Белорусија, Харел Скаат од Израел, Манга од Турција...
До заминувањето во Белорусија на домашен терен, пак, ги очекува и промоцијата на новата песна со наслов "Убава". Зад темата стојат Лазар Цветковски, автор на музиката и аранжманот, и Магдалена Цветковска, чиј е текстот. "Убава" е нешто сосема поразлично од она што досега сме го слушнале од момците, а Мартин и Стефан веруваат дека имаат летен хит, кој патем е снимен во студиото на Врчак. Радиската промоција е во тек, а наскоро се очекува снимање и на спот.

„Некст тајм“ пред 30.000 публика во Витебск

Попрок-дуото „Некст тајм“ настапи на концертот насловен „Евровизиски ѕвезди“, кој се одржа во Витебск, Белорусија, во рамките на големиот музички фестивал „Славјански базар“. На овој концерт настапуваат само поранешни евровизиски претставници на различни земји



Мартин и Стефан ја искористија својата прва можност да се претстават пред белоруската публика на сцената, но и надвор од неа. Успеаја да ги соберат симпатиите и ракоплескањата на 30.000 публика што го следеше концертот, а голем интерес за нив покажаа и тамошните медиуми.

Од организаторот на фестивалот добија отворена покана за понатамошна соработка на заеднички проекти и за гостувања во Белорусија.

Во натпреварувачкиот дел на „Славјански базар“ годинава Македонија ја претставува поп-пејачот Јоце Панов, кој во различни вечери настапува со антологиската „Има ли песна“ на Наум Петрески, со преработката на макфестовската „Ивана“ и со својата „Ти пеам песна“.